'Iaith Oleulawn'

'Dyma un o’r gweithiau mwyaf gwreiddiol a difyr am lên Gymraeg yr Oesoedd Canol a gafwyd ers tro byd. Mae’n adeiladu ar y cynnydd aruthrol a gafwyd mewn ysgolheictod testunol trylwyr dros y 40 mlynedd diwethaf... Ond nid pennod yn hanes yr iaith yw’r llyfr o bell ffordd: mae yma ddadansoddi llenyddol athrylithgar drwyddo draw, yn enwedig wrth edrych ar amwysedd a choegni, dosbarth a hil, a’r synhwyrau. Bydd croeso arbennig i’r trafod manwl ar destunau gosod fel ‘Trafferth mewn Tafarn’ a ‘Mis Mai a Mis Tachwedd’. O’m rhan innau, fe gefais oleuni newydd, annisgwyl weithiau, ar fawredd y bardd, a rhaid cyfaddef bod cael Cerddi Dafydd ap Gwilym (2010) wrth law yn hwyluso ac yn cyfoethogi’r darllen. Dyma gyfrol nodedig a fydd o ddiddordeb a budd i’r bardd, i’r ieithgi, i’r hanesydd, ac i bawb sy’n caru llenyddiaeth' - Marged Haycock, Cylchgrawn Barn, Medi 2020

'Pleser go anghyffredin yw croesawu llyfr ysgolheigaidd newydd sy’n ymdrin â llenyddiaeth yr Oesoedd Canol ac a ysgrifennwyd yn Gymraeg, yn enwedig pan yw mor ddiddorol, mor ddadlennol ac mor loyw ei fynegiant â’r llyfr hwn. Y mae Iaith Oleulawn yn amlwg yn ffrwyth cyfnod hir o ymdrwytho ym marddoniaeth Dafydd ap Gwilym ac mae’r awdur yn tynnu ar wybodaeth ddofn o’i gerddi… Dyma lyfr y gwn y byddaf yn troi ato yn fynych yn y dyfodol ac a ddaw yn fath o gyfeirlyfr ar ystyron a chynodiadau geiriau unigol a hefyd yn batrwm ar gyfer dadansoddi ieithwedd cerddi unigol. Llongyfarchiadau i Dafydd Johnston am un o’r cyfraniadau mwyaf gwreiddiol erioed i astudio llenyddiaeth Cymraeg Canol.'

- Barry J. Lewis, Dwned 26 (2020)