Ysbryd Morgan

‘Sut mae bod yn athronyddol ac yn ddychmyglawn, yn eangfrydig ac yn genedlgarol, yn ddadansoddol ac yn angerddol – y cyfan, a rhagor, ar yr un pryd? I gael yr ateb, darllenwch tour de force diweddaraf Huw L. Williams – cewch eich hysbrydoli yn y fargen.’
-Cynog Dafis

‘Mae’n bolemig huawdl a grymus, yn adeiladol o bryfoclyd ei gasgliadau. Da gweld ysgolhaig ifanc a dawnus yn ymarfer cyhyrau ei ddeall.’
-Yr Athro M. Wynn Thomas, Prifysgol Abertawe

‘Yn y llyfr hwn, fel yn ei ragflaenydd Credoau’r Cymry, atgyfodir ar gyfer cenhedlaeth newydd drysorau’r traddodiad athronyddol Cymreig. Eto nid achub pwnc yn unig yw’r nod y tro yma, ond achub cenedl a phlaned o’u hargyfyngau gwleidyddol a hinsoddol trwy oleuni “Ysbryd Morgan”.’
-Yr Athro Emerita Jane Aaron, Prifysgol De Cymru

'Er bod dysg eang yr awdur yn amlwg, nid testun academaidd digyffro yw’r llyfr pwysig hwn. Mae Huw Williams yn ysgrifennu gyda thaerineb sy’n dwyn i gof arddull J. R. Jones. Dyma alwad i ddeffro ac i weithredu, a hynny ar fyrder. Mae’r gyfrol yn amserol iawn gan ein bod fel gwlad ar drothwy newidiadau sylfaenol i’n patrymau o fyw. Cenadwri Huw Williams yw fod yn rhaid i ni sicrhau cymdeithas sosialaidd, gymunedol a chyfanfydol os ydym fel Cymry i fod yn driw i’n gwreiddiau ysbrydol.'
- E. Gwynn Matthews, Gwales.com

‘Yng Nghymru heddiw, nid oes unrhyw le ar gyfer ein traddodiad deallusol brodorol. Rhagoriaeth a chyfraniad cyfrol Huw L. Williams yw ei fod yn ceisio adfer y traddodiad coll… Datblygiad cyffrous mewn ysgolheictod Cymraeg yw’r pwyslais newydd hwn ar waith sy’n ‘greadigol’ yn hytrach nag yn awdurdodol ei genadwri.’
– Simon Brooks, Cylchgrawn Barn Ebrill 2021